အစိုးရအဖွဲ့က ပထမဆုံး “ပြည်နှင်ဒဏ် (Deportation) စည်းမျဉ်း” ကို အတည်ပြု၊ တရားမဝင် နိုင်ငံခြားသားများကို အမြန်ပြန်ပို့ရန် တင်းကျပ်စွာ ဆောင်ရွက်မည်။
၂၀၂၆ ခုနှစ် ဇူလိုင်လ ၁၄ ရက်နေ့တွင် ဝန်ကြီးချုပ်ရုံး ပြောရေးဆိုခွင့်ရှိသူ Ms. Ratchada Thanadirek က ထုတ်ဖော်ပြောကြားရာတွင် ၂၀၂၆ ခုနှစ် ဇွန်လ ၁၆ ရက်နေ့ အစိုးရအဖွဲ့အစည်းအဝေးမှ ဒုတိယဝန်ကြီးချုပ် Pakorn Nilprapunt ကို သက်ဆိုင်ရာဌာနများနှင့် ပူးပေါင်း၍ လူဝင်မှုကြီးကြပ်ရေးဆိုင်ရာ ဥပဒေ၊ စည်းမျဉ်းနှင့် လုပ်ထုံးလုပ်နည်းများကို ပြန်လည်ပြင်ဆင်ရေးအတွက် အဓိက တာဝန်ပေးအပ်ခဲ့ကြောင်း ပြောကြားခဲ့သည်။ ရည်ရွယ်ချက်မှာ ပြစ်မှုကျူးလွန်သော သို့မဟုတ် တရားမဝင် ထိုင်းနိုင်ငံအတွင်း ဝင်ရောက်နေထိုင်သူ နိုင်ငံခြားသားများကို ထိုင်းနိုင်ငံတွင်းမှ ပြင်ပသို့ ပြန်လည်ပို့ဆောင်သည့် လုပ်ငန်းစဉ်အား ပိုမိုလျင်မြန်စေရန် ဖြစ်သည်။
လက်ရှိအချိန်တွင် ထိုင်းနိုင်ငံ၌ "ပြည်နှင်ဒဏ်" နှင့်ပတ်သက်သော တရားဝင် စည်းမျဉ်းစည်းကမ်း သီးသန့်မရှိသေးသဖြင့် အစိုးရဌာနအချင်းချင်း ပူးပေါင်းဆောင်ရွက်မှုများ လိုအပ်နေကြောင်း၊ ထို့ကြောင့် နိုင်ငံတော်အကျိုးစီးပွားအတွက် ပြည်နှင်ဒဏ်ဆိုင်ရာ စီမံခန့်ခွဲမှုများကို မြန်ဆန်ထိရောက်စွာ ဆောင်ရွက်နိုင်ရန် စည်းမျဉ်းသစ်တစ်ရပ် ချမှတ်ရန် လိုအပ်ကြောင်း ပြောကြားခဲ့သည်။
ယနေ့ အစိုးရအဖွဲ့အစည်းအဝေးတွင် ဒုတိယဝန်ကြီးချုပ် Pakorn Nilprapunt တင်သွင်းသည့် “ဝန်ကြီးချုပ်ရုံး၏ ပြည်နှင်ဒဏ်ဆိုင်ရာ စည်းမျဉ်း” မူကြမ်းကို အတည်ပြုခဲ့သည်။
ပြည်နှင်ဒဏ်ပေးနိုင်သည့် ပြစ်မှုအမျိုးအစား ၆ မျိုး၊ ပြည်သူ့လုံခြုံရေးနှင့် အများပြည်သူ၏ စာရိတ္တကောင်းမွန်မှုကို ထိန်းသိမ်းရန် လိုအပ်သည်ဟု သတ်မှတ်ပါက အောက်ပါ ပြစ်မှုများ ကျူးလွန်သည့် နိုင်ငံခြားသားများကို ပြည်နှင်ဒဏ်ပေးနိုင်သည်။
- ဥပဒေနှင့်မညီဘဲ ထိုင်းနိုင်ငံအတွင်း ဝင်ရောက်ခြင်း သို့မဟုတ် နေထိုင်ခြင်း။
- နိုင်ငံခြားသား အလုပ်သမား ဥပဒေကို ချိုးဖောက်၍ အလုပ်လုပ်ခြင်း။
- နိုင်ငံခြားသား စီးပွားရေးလုပ်ငန်း ဆိုင်ရာ ဥပဒေကို ချိုးဖောက်၍ စီးပွားရေးလုပ်ငန်း လုပ်ကိုင်ခြင်း။
- အစိုးရစာရွက်စာတမ်းများ အတုလုပ်ခြင်း သို့မဟုတ် အတုစာရွက်စာတမ်း အသုံးပြုခြင်း။
- ထောင်ဒဏ် ၃ နှစ်နှင့်အထက် ချမှတ်နိုင်သော ပြစ်မှုများ ကျူးလွန်ခြင်း။
- အထက်ပါ အချက် (၁) မှ (၅) အထိ ပြစ်မှုများတွင် ဦးဆောင်သူ၊ လှုံ့ဆော်သူ သို့မဟုတ် ကူညီပံ့ပိုးသူ ဖြစ်ခြင်း။
ထို့အပြင် ပြောရေးဆိုခွင့်ရှိသူက အဆိုပါ စည်းမျဉ်းမူကြမ်းအရ သက်ဆိုင်ရာ အစိုးရဌာနများအနေဖြင့် အောက်ပါလုပ်ငန်းများကို ဆောင်ရွက်ရန် လိုအပ်ကြောင်း ပြောကြားခဲ့သည်။
1. အကျဉ်းထောင်မှ မလွတ်မြောက်မီ အသိပေးအကြောင်းကြားရန်
အကျဉ်းဦးစီးဌာန ညွှန်ကြားရေးမှူးချုပ်သည် နိုင်ငံခြားသား၏ အမည်၊ နိုင်ငံသားအမျိုးအစား၊ အမှုတွဲ၊ သက်သေခံစာရွက်စာတမ်းများနှင့် သက်ဆိုင်ရာအချက်အလက်များကို ပြည်ထဲရေးဝန်ကြီးဌာန အမြဲတမ်းအတွင်းဝန် သို့မဟုတ် တာဝန်ပေးထားသူထံ သတ်မှတ်ထားသောအချိန် မတိုင်မီ ပေးပို့ရမည်။
ထို့နောက် ပြည်ထဲရေးဝန်ကြီးဌာန အမြဲတမ်းအတွင်းဝန် သို့မဟုတ် တာဝန်ပေးထားသူက ပြည်ထဲရေးဝန်ကြီးထံ တင်ပြပြီး ပြည်နှင်ဒဏ် အမိန့်ကို အမြန်ဆုံး ထုတ်ပြန်စေရမည်။
ပြည်ထဲရေးဝန်ကြီးဌာနသည် ပြည်နှင်ဒဏ်ချမှတ်ခံရသူကို ၎င်း၏ နိုင်ငံသားဖြစ်သော နိုင်ငံသို့ ပြန်လည်ပို့ဆောင်ရန် တာဝန်ယူရမည်။ အကယ်၍ နိုင်ငံသားဖြစ်မှု မရှင်းလင်းပါက ထိုင်းနိုင်ငံသို့ မဝင်ရောက်မီ နောက်ဆုံးနေထိုင်ခဲ့ကြောင်း ကြေညာထားသော နိုင်ငံသို့ ပြန်လည်ပို့ဆောင်မည် ဖြစ်သည်။
2. အခြားနိုင်ငံ သို့မဟုတ် အပြည်ပြည်ဆိုင်ရာ အဖွဲ့အစည်းမှ လက်ခံလိုပါက
ပြည်နှင်ဒဏ်အမိန့်ချမှတ်ခံရသူ၏ နိုင်ငံသားမဟုတ်သော အခြားနိုင်ငံ သို့မဟုတ် အပြည်ပြည်ဆိုင်ရာ အဖွဲ့အစည်းက ၎င်းအား လက်ခံရန် ဆန္ဒရှိပါက သံတမန်လမ်းကြောင်းမှ တရားဝင် တောင်းဆိုစာတင်ပြရမည်။
ထိုနိုင်ငံ သို့မဟုတ် အဖွဲ့အစည်းသည် ပြည်နှင်ဒဏ်ခံရသူအား လွှဲပြောင်းမပို့မီ ဖြစ်ပေါ်လာသည့် စောင့်ရှောက်မှုကုန်ကျစရိတ်များနှင့် ပို့ဆောင်ရေးစရိတ်အားလုံးကို တာဝန်ယူမည်ဟု ဖော်ပြရမည်။ ထို့အပြင် ပြည်နှင်ဒဏ်ခံရသူကိုယ်တိုင်လည်း စာဖြင့် သဘောတူညီမှု ပေးရမည် ဖြစ်သည်။
ဤစည်းမျဉ်းသစ်သည် ထိုင်းနိုင်ငံ၏ ပထမဆုံး ပြည်နှင်ဒဏ်ဆိုင်ရာ တရားဝင်လမ်းညွှန်ချက်ဖြစ်ပြီး တရားမဝင် နေထိုင်သူများ၊ တရားမဝင် အလုပ်လုပ်သူများ၊ စာရွက်စာတမ်းအတု အသုံးပြုသူများနှင့် အခြား အပြစ်ကြီးပြစ်မှုကျူးလွန်သူ နိုင်ငံခြားသားများကို ပိုမိုမြန်ဆန်စွာ ပြည်နှင်ဒဏ်ပေးနိုင်ရန် ရည်ရွယ်ထားသည်။